لو فيه واحد كان فاكر إن الإنتخابات حا تخلى مصر حاجة تانية: واهم. لو فيه حد كان فاكر الإخوان حا يخسروا الإنتخابات: عايش فى الشبورة.
لو حد فاكر إن بديل مبارك حد تانى غير الشيخ أبو إسماعيل: أقول له صح النوم.
لو حد فاكر إن الدستور إللى جاى حا يتضمن كلمة واحدة تحمى الأقباط أو المسلمين الليبراليين: يبقى واحد خيالى مش عايش على أرض الواقع. والعينة بينة إكتساح التيار الدينى فى بداية الإنتخابات وفى المناطق إللى كان ممكن يكون فيها الرمق ولسه حا تشوفوا إكتساح مالوش حدود فى قرى وصعيد مصر وسلم لى على الديموقراطية وصندوق الإنتخاب.
قعدتوا تقولوا حزب الكنبة حا يطلع يكسر الدنيا قعدتوا تقولوا الإخوان حا يعرفوا حجمهم مصر بخير وطلعوا ننانيس الثورة يعملوا شبورة ويمثلوا دور الضحية فى ميدان التحرير ويعلنوا الحرب على الشرطة وبعدين يسوروا ميدان التحرير علشان ناويين يقعدوا فيه 30 سنة فى الشارع ويعملوا جمهورية الموز ومقرها مجمع التحرير ورمزها قاعدة التمثال المهجور بميدان التدمير.
حزب الكنبة إللى بتقولوا عليه نصه بدقون والنص التانى لابس نقاب وعند اللزوم بينزل الشارع ويعبر عن التطرف والدروشة إللى ماليه المجتمع والحق على إللى قرا الموضوع غلط فمن أول يوم من نكسة خساير قلنا إن دى الفرصة الذهبية لإقامة الدولة الدينية ففى وجود الحاج أبو عمامة ومعاه وزيرة خارجية ما تعرفش الألف من كوز الدرة وفى وجود تخبط سياسى فى مصر وناس إتنصب عليها ولقيت نفسها متورطة فى غلطات ما يقعش فيها مبتدئ سياسة فخلوا الإنتخابات قبل الدستور وخلت رئيس الجمهورية منظر زيه زى خيال المأتة والشارع الجاهل ديموقراطيا هو إللى سايق والحكاية تحولت لحرب بين من يعلى من شأن الدين ومن يتم تصويره على إنه هادم للدين وطبعا كلنا عارفين النتيجة.
يلا بعد الإنتخابات إيدينا فى أيد بعض نهد الهرم ونكسر أبو الهول ونحطم تماثيل الفراعنة ونحجب وننقب كل ستات مصر ونعين فى الحكومة إللى دقنه أطول ونحول كنايس مصر لمجمع خدمات ونمنع دخول السياح الأجانب ونطلع على شرم الشيخ والغردقة ونكسر القرى السياحية ونسرح العاملين فى السياحة ونهتف لأبو إسماعيل ونقوله إخترناك إخترناك ونحول مصر لأفغانستان جديدة أو صومال جديد وحا نهد حضارة 7000 سنة وكله ببركة ثوار التحرير إللى هبروا الهبرة من ماما أمريكا وقدموا مصر تفاحة مقشره لإخوان طظ فى مصر وشركاءهم أمات دقون وجلاليب قصيرة.
خربتوا البلد بثورتكم المشؤومة ومش إنتم وحدكم المسؤلين فالنظام السابق إللى خلى مفيش إختيارات يا إما نظام مبارك بفساده يا نظام الإخوان والسلفيين وطبعا شباب الفيس بوك والتويتر كان مجرد منيديل كلينيكس تستعمله مره واحدة وترميه وأهم ملقحين فى ميدان التحرير وإللى ما يشترى يتفرج وبقول لهم روحوا شوفوا لكم شغلانة بدل ما إنتوا بياعين كلام لا يودى ولا يجيب لأنكم خربتوها وقعدتوا على تلها
0 comments:
إرسال تعليق