الله معك .. يا بَـيتْنـا المهجور

بكينا ، وكُوِينا الشوق بغيابك

بعاد صرنا.. خلف سبع بحـور

وماتـو الاهل وتْسَكَّرو بْـوابَـك

يبس الحبق والفل والمنتـور

تبهْدَل عَ مَـر العمْـر مـزرابـَك

صار متل الجانِـح المَـكْسـور

بيعمل مشاوير .. عَ جنـابَـك

نْهَدّ القبو والارض صارت بـور

وَيْنَك يا بيي؟.. يرحم ترابَـك

بغيبتك اكل الصدي المعدور

ويمكن الغَبْـرة اكلت تْـيـَابـَك

هاك العريشة! ما لها ناطور

المنها تْوَدّي سلال لصحابك

مسَلَّط على حَبّاتـها الدَبّـور

و عَالارض هَرهَر حَب عنّابك

كنت .. بالطّـيقـان يا عُصـفور

تعشعش ويْـتـجَمَّعو صحابَـك

وحدك بـواقـع حالـنا..مسرور

صار كل البيـت ..عَ حسابَـك

يا بَـيْتنـا .. مـشْتـاق مَـرّة زور

بلادي ويا بابي بوّس خشابك

والمَـوْقَـدة ، والجرن ، والتَّنـور

وامسح بدَمْعي غَـبْـرة عتابك

 _ سيدني

استراليا