بدعوة من مؤسسة "إنماء الشعر العامي العربي في اوستراليا والوطن العربي
سيدني- استراليا، في 10-11- 2013
بموتك جرحت الفن واللحن انظلم والشعر عاغيابك بينوح من الألم
والطرب صفّى بعد منك يتيم وآخ العتابا غصّ عا شفاف القلم
الله عطاك بنعمتو الصوت الرخيم ولبنان منك صك فردوسو استلم
ومن كتر ما شأنك عاموطنا عظيم وبهالمواهب كنت نار على علم
سعادة القنصل قرّر المحفل يقيم وعاغيابك نكّس بايدو العلم
انبح الوتر والعود طق من الصقيع وصوت الإذاعة ما بقا قادر يذيع
ولبنان والارز وجبالو تنهدّو ونام الصدى عامخدة الصوت البديع
ومنجيرة الألحان زنّرها الحدو غاب راعيها وشرّد معها القطيع
الكانو على صوتو الجميع يعيّدو مات وبموتو اسودت عياد الجميع
مات البأنغامو العذارى تمجّدو وبلون حنجرتو انرسم لون الربيع
مات العا طلعاتو الهموم تبدّدو وتبلسم بترتيلتو الجرح الوجيع
مات القدر لبنان كلو يجسّدو وغنى جمالو وما قبل حقو يضيع
مات اللي صوتو عالمدى بيخلدو اسطوانة سحر بالكون الوسيع
مات اللي كل مطرب قصد يتقلدو بتقليد صوتو نال المقام الرفيع
والبلابل اللي معودين يغردو وعليهم الالحان دلّو بالصبيع
سمعتهم عم يندبو ويرددو يحرم علينا الصوت بعدك يا وديع
كروم الدوالي الدمعّو عناقيدها لولاك يا صافي ماطاب نبيدها
ولبنان يا قطعة سما في كل آن القلوب صرختلك دخيلك عيدها
وطرزت للأرزات طرحة عنفوان ومن صوتك الأخضر خضار تزيدها
وضياعنا الغنيتها بصوتك كمان صارت عاألحانك تعيّد عيدها
وهاك الجبال السمر خليّت الزمان لشموخها يركع ويبوّس إيدها
وقلعة بعلبك قبل ما التاريخ كان ختير الدهر بفيّة تجاعيدها
وكنت لما تقيم فيها المهرجان يسكرو عاصوتك عواميدها
واليوم عم تنسكب دموع الأرجوان وموج البحر عم يغرق بتنهيدها
برثيك من احساس نازف بالدما وبحزن عم يشرب من دموع الظما
مش عيلتك بس البحالي محزني لبنان كلّو انصاب وانهز الحما
يا غبن صوتك للنهايي ينحني الحوّل صخور الصم للجوري حما
وأوتارك المن عند الله مدوزني خلّت العميان تتحدى العمى
يا جوهر ومقلع داري متمني الإبداع حدك حط راسو وارتمى
ولو صارت سنينك عتيقة ومزمني عتق الخمر بالأوليي بينسما
انت اللي رتلت الصلاة المؤمني صلاة الأبانا العم بتوميلك وما
بترحم عليك وخلودك بالغني منك بحاجي للشفاعة طالما
من السما نازل بصوتك عالدني ومن الدني طالع بصوتك عالسما
0 comments:
إرسال تعليق