الفوضجية/ د. ماهر حبيب

خرج الفوضجية لحرق مقار إنتخاب الرئيس أحمد شفيق لأنهم يروا الديموقراطية هى نجاح مرشحهم فقط  بالظبط زى سعيد صالح عن المنطق لما واحد يضرب واحد على نافوخه يقع ما يحطش منطق مش هو ده المنطق برضه  والا أيه يا أساتذة يا تنتخبوا صباحى أو عبد المنعم لا نولع لكوا فى البلد نفس منطق أى ديكتاتور تنتخبونى والا تنتخبونى ما هو لو ما إنتخبتونيش حا أولع فيكم وبرضه حبقى الرئيس.
شوفوا الأنسة المحترمة أسماء محفوظ الست المؤدبة المحترمة إللى صادر ضدها أحكام بالتعدى على ناس محترمين ومطلوب سجنها بحسب حكم القاضى شوفوا الهانم بتقول أيه (غووور في ستين داهيه الله يحرقك من عند ربنا يا زباله) وأنا أسف لنشر زبالتها لكن بس علشان أعرفكم نوعية الناس إللى تحولت فى يوم وليلة لنجوم مجتمع وإذا كانت الست السياسية بتتكلم كده يبقى سابت أيه للعربجية وولاد الشوارع.
طبعا حريق مقار شفيق مش معزول عن تصريح المرشح الإستبن إمبارح فى مؤتمره الصحفى لما قال حا ندوس على معارضينا بالجزم وأنا أول ما قريت الهطل ده إفتكرته صحفى كاتب أى كلام لكن طلع الراجل بيقول على إللى صوتوا لشفيق القوى الساسية يعنى جماعة الإخوان وأصحابها سيدوسون بالأقدم كل من يحاول عودة النظام يعنى شفيق ودى كلمة السر لحرق المقار بالظبط زى بن لادن ما كان يطلع يقول بيان وتانى يوم نلاقى مصيبة كبيرة حصلت.
طبعا نحن نعيش أزهى عصور ديموقراطية الفوضجية بنظام فيها لأخفيها وهما ما عندهومش مانع يولعوا فى البلد كلها ما دام مستورة والحمد لله البلد حالها واقف من سنة ونص وبرضه لسه بتوع المظاهرات موجودين وصامدين ما دام خير ربنا كتير وخزائن على بابا مفتوحة والخير بالعملة الصعبة كتير علشان نعمل الفوضى الهدامة والرعاع يتحولوا إلى سوبر ستار.
أنا وكل الناس إللى زهقت من الأشكال دى من أيام محمد محمود والعباسية نطالب المجلس العسكرى بالحزم وقطع رقبة إللى يعبث بأمن البلاد خلاص إحنا طهقنا من الإسطوانة المشروخة وحكاية الناس إللى ماتت فى حرق الأقسام ومهاجمة السجون وحرق المولات ونهب المحلات والا إنتوا نسيتوا إللى حصل فى البلد أيام نكسة بناير ولازم القانون يتطبق على الوزير والغفير ومرشح الرئاسة إللى يثبت إنه أو أنصاره أشاعوا الفوضى أو حرقوا حتى كشك سجاير يباتوا كلهم فى السجن لأن البلد مش ناقصة وكمان بعد أيام حا يتحكم فى قضية الرئيس السابق / مبارك حا يعملوا أيه لو القاضى لقاه بريئ وحكم عليه بالبراءة أو الحكم ما جاش على كيف أسماء وأشكالها نجيب لهم مليون لتر سولار علشان يولعوا فى البلد ...إرحمونا من الفوضجية لأن ده لا يمكن يتسمى ثورة بل فوضى و لأن  إللى عاوز يعمل حاجة يا يعملها صح يا ياخد جزاؤه لو خالف القانون والا الثورة هى تسليم البلد للإخوان أو هد البلد على إللى فيها وكلمة فى ودن هؤلاء لو فضلتوا تعملوا كده الشعب بالعند فيكم حا ينتخب شفيق لأنه راجل حا يمسك البلد السايبة بأيد قوية ويعدل المايل ويصلح إللى إتخرب فالشعب يريد عودة الدولة وإنتم لا عاوزين دولة ولا غيره إنتوا عاوزين مظاهرة وتشبعوا فيها حرق