أولا بأهنى المصريين الناصحين على المفاجأة السعيدة بصعود الفريق أحمد شفيق لجولة الأعادة فى معركة الرئاسة المصرية وصحيح أنا من أنصار شفيق وكان صوتى بالتأكيد ليه لكنى كنت حاطط أيدى على قلبى لأن الهجوم على الرجل كان فظيع و الإهانات غير محتملة ولكن المعدن النفيس تصقله النار والرجل خرج من غبار الإهانة وقلة الأدب مرفوع الرأس وإنتصر إنتصارا مدويا حتى لو خسر المعركة النهائية.
لكن تعالوا نقارن بين شفيق ومرشح الإخوان الإستبن فشفيق دخل الصراع فى وجود عمر سليمان الرجل القوى ولم يكن شفيق إحتياطيا لسليمان بينما مرسى دخل الإنتخابات بالصدفة لما حسوا إن مرشحهم مش داخل الإنتخابات المرة دى فجابوا ليه محلل علشان يحتفظ للشاطر ببدلة الرئيس ويخلى باله على الكرسى إللى حا يلزق للإخوان 30 سنة وزى ما مبارك كان حا يورث الرئاسة لجمال كمان مرسى حا يورث الكرسى بالتبنى لغاية ما ينضفوا صحيفة سوابق الشاطر.شفيق خرج فى الإعلام ببرنامج واضح هو إستعادة الأمن وتنضيف ميدان التحشيش حاليا التحرير سابقا وتطبيق المواطنة والمساواة بين أفراد الشعب المصرى والأهم هو إنه حا يظبط التعليم عن طريق إستقدام بيوت خبرة عالمية لتصليح حال التعليم المايل وزى ما عمل فى مطار مصر العظيم والتحفة قرر إنه حا يكرر التجربة لأهم نقطة فى مصر وهى التعليم وطبعا راجل زى شفيق ما عندوش عقدة إن السياحة حرام وبالتالى حا تشهد السياحة طفرة عظيمة لإنقاذ الإقتصاد المتهاوى.
نيجى على الناحية التانية راجل لا نعرفه ولا سمعنا صوته راجل ما كنش فى الصورة راجل يدين للسمع والطاعة للمرشد وحالف يمين الولاء على المصحف والمسدس راجل من جماعة الإخوان إللى بيقسموا حتى المسلمين أنفسهم لإخوانى وغير إخوانجى يبقى حا يعمل أيه فى باقى خلق الله ممكن حد يفهمنى على أى أساس الراجل ده يخش الإعادة ده برنامجه سرى وما نعرفش عنه حاجة لكن نقول أيه ما هو دى لعبة الصندوق والإنتخابات إللى بيجيدها الإخوان من زمان.
طبعا من حق الإخوان وإخواتهم السلفيين وأعضاء التكفير والهجرة والجهاد والقاعدة وحملة الأعلام السودا إنهم ينتخبوا مرسى علشان فكرهم وهدفهم إقامة الخلافة وتولى المرشد أمور المؤمنين فقط لكن المصيبة إللى جاية من شباب التحرير وأتباعهم ( مش قصدى عصافير أمن الدولة ولا أعضاء لجنة السياسات المخفيين) حا يكرروا نفس غلطتهم من ساعة 11 فبراير لما قعدوا يندبوا ويصوتوا ويخرجوا من جمعة لجمعة ومليونية ورا مليونية ونسيوا يروحوا بيوتهم ويتفرجوا على التلفيزيون وإن زمايلهم الإخوان سابوا الميدان من زمان ولهطوا التورتة كلها وما سابوش ليهم حتى حتة قشطة صغيرة وبنفس الغباوة أتوقع إنهم حا يسلموا دقنهم للإخوان إللى حا يسحلوهم بعدين لما الرئيس الإخوانى يبعت قانون السحل لأعضاء مجلس الندامة الإخوانى إللى حا يوافق عليه بالأغلبية ويبعتوه لوزير الداخلية الإخوانى علشان ينفذه وطبعا حبايبنا بتوع ميدان فى التحرير قاعدين فى الميدان يمكن يبعتوا لهم ساندوتش كنتاكى أو حواووشى من شارع مجلس الشعب لكن اللحمة خلصت والمولد إنفض وبرضه لسه مش عارفين هما بينضحك عليهم ليه مع إنهم غلابة لكن مش عارفين إن الطريق إلى جهنم الإخوان مفروش بالنوايا الحسنة ومعارك محمد محمود والعباسية وياريت حد يوشوشهم فى ودانهم ويقول لهم الغلطة الجاية بورطة ومش حا ينفع الندم بعد الفاس حا تقع فى الراس ولكنهم يؤمنون إن التكرار بيعلم الشطار يا شطار ولكننا بنقول لكم بأعلى الصوت إلعبوها صح المرة دى
0 comments:
إرسال تعليق