يا شاطر هى الساعة كام؟/ د. ماهر حبيب

إن كان مبارك ساعته مأخرة وفشل فى إدارة أزمة يناير بسبب الساعة البايظة فإن مرسى طلع إنه ماعهوش ساعة أصلا قاعد فاقد الزمن وغالبا غايب عن الوعى ومحتاج حد يصحيه هو وإللى حواليه إن إللى بيحصل ده أكبر من تصورهم وإن الحريق إللى أشعلوه ولع فيهم وفى البلد كلها وهما ولا هما هنا غباء منقطع النظير وتصرفات مفضوحه يكشف كل ما فعلوه سابقا وحاضرا فقد فضحوا ما فعلوه فى موقعة الجمل الأولى وكرروه اليوم فى موقعة الجمل التانية بس النهارده كان من غير جمل لكن بخرطوش وشوم وحجارة وملوتوف.

والسؤال المهم هو سعادة رئيس مصر كلها فين؟ صاحى نايم فى غيبوبة صحته كويسه وبيشوف التليفزيون غير قناة وجدى غنيم وأبو إسلام  محدش قاله إنك صحيح إخوانى ومتحيز قلبا وقالبا مع الإخوان لكن حد بس يهمس فى ودنه إنت رئيس الناس كلهم حتى لو كانت الناس مش طايقة تشوف وشك ولا تسمع صوتك لكن مضطرين مؤقتا نعصر على نفسنا ليمونة ونقبل تصرفاتك لغاية ما ربنا يخلصنا من الغمة دى ولو كنت بتراعى الوطن لكن بهذا الغباء السياسي بنقول لمرسى الحسبة غلط فى غلط والناس كانت منتظرة إنك تتصرف بشياكة الرئيس وبعدالة الحاكم ومتى تتكلم ومتى تسكت لكن بالرغم من إن كل قراراتك ليلية فإنت المرة دى شديت اللحاف ودخلت نمت وإنت حاطط فى بطنك بطيخة صيفى إن البلد فى أيد الإخوان فا مفيش مشكلة حتى لو خلصوا على البلد كلها.

اليوم إنكشف وإنفضح اللهو الخفى إللى قعدنا نقول عليه فهم لهو موقعة الجمل وهم لهو ميدان التحرير الذى قتل المتظاهرين وعندما أثبت القضاة أن من قتل المتظاهرين ليسو هم ضباط وجنود الشرطة بل هم الإخوان وقد إكتفى القاضى بأن يقول براءة للبرئ ولم يفصحوا أكثر لكن لأن الإخوان يقولوا فى أنفسهم يكاد المريب أن يقول خذونى وبطريقة خدوهم بالسوط لا يغلبوكم فخرج مرسى بقرارت تحاول أن تلبس البرئ جريمة الإخوان وحصن نفسه وسلق دستورا يحميه ويحمى إخوانه لكى ما ينجوا بأفعالهم وجريمتهم  وعندما إعترض الشرفاء على سرقة مصر أخرج الرئيس بلطجياته وقتلة المتظاهرين مرة أخرى ليعيدوا مشاهد موقعة الجمل وقتل الأبرياء وهناك تهم معلبة محفوظة إنهم الفلول وكلنا يعلم أن الفلول هم الإخوان فقط والقتلة هم الإخوان فقط ومن سرق الثورة هم الإخوان فقط بل من سرق البلد هم الإخوان.

إصحى يا مرسى من النوم فمبارك كانت ساعته متأخرة 24 ساعة فراح فى الرجلين وإنت راجل فاقد الزمن ومبارك كان رجل دولة خانه جيشه وسلم لكم البلد وإنت لا تفهم فى السياسة وخبرتك فى السياسة لا تتعدى فهمك لكيفيه عمل عملية قلب مفتوح فإحنا بنقول لك بالبلدى الدنيا خربت وجرت على نفسها براقش ولو ما صحيتش من النوم دلوقتى وأنقذت البلد من أفعالك الطائشة فبنقول لك فاتك القطار وفات الميعاد وبقينا بعاد بعاد و راحت فرصتك مش إنت بس إنت وكل إللى يتشدد لك فشعب مصر أعصى عليك من أن تشتريه بزجاجة زيت وكيس سكر فمصر أغلى من كده بكتير وإشترى لك ساعة حتى من واحد من الباعة الجائلين فى العتبة علشان تعرف الوقت لأنه مش معقول تدور على الشاطر كل مرة وتسأله هى الساعة كام؟