بلطجى ومخبر وحرامى/ د. ماهر حبيب

الحياة فى مصر سهلة جدا والوظائف على قفا مين يشيل والترخيص بالعمل مفيش أسهل من كده فى العالم كله ولا إنت محتاج لترخيص ولا شهادة ولا سى فى ولا أى حاجة خالص عاوز تشتغل أيه ؟ دكتور مش لازم بكالوريوس طب كل إللى عليك تذاكر تذكرة داود إللى بتموت الدود وتجيب شوية أعشاب وتعبيها فى أكياس وتقف فى الشارع أو فى ميدان التحرير أثناء الإعتصامات أو تنزل تبيع فى مترو الأنفاق ده كيس علشان إللى ما بتخلفش وده كيس للعجز الجنسى وده كيس بيعالج المغص الكلوى وده بيعالج السكر والضغط وده بيشفى من المرحلة الرابعة للسرطان كل إللى تعمله دوب الكيس فى كوباية ميه وبعد ما تصلى وإنت طاهر إشرب الكيس وحاتشوف كل إللى تحلم بيه.

عاوز تبقى أشهر من نار على علم طول دقنك وإلبس جلابية قصيرة وتعاقد مع قناة من قنوات الفتاوى وإطلع قول أى حاجة والناس حا تصدقك إشتم وسب إقلع جزمتك لضرب الناس ما تخافش مفيش حد بيحاسب قول على دى فاجرة ومشيها بطال ولا تحط فى بالك إنك حا تقع تحت طائلة القانون قول ما بدالك وكل الإخوانجية والسلفيين فدائك ودراعك اليمين ومهما عملت وسبيت أديان الأخرين فديتها وأخرها ياخدوا منك كلمتين وإنت قاعد حاطط  رجل على رجل والمحقق قاعد رجليه بتخبط فى بعضيها لأحسن تزعل ولا حاجةوبعدين ولا تخاف ولا تتهز ما إنت خد رخصة داعية ومحدش يقدر يقول لك تلت التلاتة كام.

عاوز تبقى بلطجى إشترى شومة وإنزل الشارع ومعاك إتنين تلاتة قبضايات وإعمل كل إللى يخطر على بالك ومحدش حا يستجرى يطلب لك الشرطة ما هو الشرطة أساسا مش موجودة ومش حا تييجى هو فيه عسكرى ناصح اليومين دول يقدر ينزل الشارع علشان يطبق قانون هو كان مستغنى عن روحه أهو شارى دماغة ومستخبى و مش فاضى يعمل حاجة غير لو جات له أوامر بسحل حمادة على سبيل التسلية ولو كنت شارب لبن السباع وأخذتك الشجاعة إنك تروح القسم علشان تبلغ عن الفتوة فحا تلاقى القسم مقفول بالضبة والمفتاح لغاية ما يبان للشرطة إصحاب أو يعملوا مزاد علنى الإخوان يشيلوا أقسام القاهرة والجيزة والجماعة الإسلامية تاخد إقسام الصعيد مقاولة وأقسام بحرى شركة بين حازمون وحزب الوسط.

عاوز تبقى قاضى بعد صلاة الجمعة فى أى قرية أخرج وقول يا أهل الكفر لقد خرج جرجس عن القانون وحلم بالليل إنه حا يبنى كنيسة مطرح بيته وأنا قررت أكون القاضى والحكومة والقانون وأفتيت بهد بيت جرجس وقطع رقاب إخواته الخمسة ومتخافوش حتى لو طلعتوا فى التليفزيون ومصر كلها شافتكم فأنا القانون والقاضى ومحدش حا يمس لك شعرة ولو حتى إتمسكتوا فأنا القاضى إللى حا يقعد فى قعدة العرب وإللى حا أحكم بيها على ورثة جرجس وإخواته إنهم يطلعوا ينكروا إن المرحوم جرجس كان ناوى يبنى كنيسةوإنهم متنازلين عن دمهم ويتم مبادلة الأرض مقابل السلام.

عاوز تبقى رئيس خش السجن بتهمة التخابر مع دول أجنبية وبدل ما تاخد مؤبد يطلع إللى كنت بتتخابر معاك وحلفاءك فى البيت البيض حا يحموك وحا يعملوا مش واخدين بالهم وحماس أصحابك بيقتحموا السجون علشان تبقى إنت رئيس جمهورية تهرش بنطلونك وتبص فى ساعتك وتشاور بصباعك وإنت بتفرض حظر التجول علشان بعد كده الناس تتجول على روحها عندا فيك.

عاوز تبقى عسكرى ظابط شرطة أو حتى لواء روح عند الشاطر وإسأله فين بدلتى إللى جاية فى الكونتينر إللى جاى من قطر حا يقولك البدلة على أيدك اليمين ودب إيدك فى الشوال إللى حنبى وطلع الرتبة إللى تطلع فى إيدك تبقى من نصيبك تطلع لوا تبقى نقيب تبقى ملازم أهو إنت ونصيبك.

عاوز تشتغل وكيل نيابة خد صورة من قرار المدعى الخاص الإخوانى وإطلع قفش فى الناس ده بتهمة إهدار مال عام وده بتهمة البلطجة علشان معلق صورة حمدين ع الحيطة وده بتهمة التخريب لأنه الإخوة شافوه وكوباية الشاى وقعت من إيده فإنكسرت ودى مال عام ومن أثار مصر الحديثة وأهو تبقى وكيل نيابة وظابط ومخبر وحرامى ومفيش  أى مشاكل... شوفتوا بقى الدنيا سهلة إزاى  والا أقول لكم بعد ما الشرطة حا يقضى عليها مرسى وإخوانه حا يبقى مفيش لازمة للظباط وخلينى بقى كلنا نبقى بلطجى ومخبر وحرامى