خدني معك/ فؤاد نعمان الخوري

ل جبران خليل جبران

خدني معك من أورفليس:
زغرت عليّي هالدني
وعم انحني
متل الشبيّه الغافيه بكمّ الحبيسْ!
خدني معك،
لا تقيس عمري بالسنه،
... ... بالقهر قيسْ
بظلم هالبحر التعيسْ...
سدني... عروس الليل
وبليس العريسْ!
***
عَ القبر بـ بشرّي الحبق قونه
والبنفسج صليبْ...
وهالشمس مجنونه
عم تفتّش عن خْيال الحبيبْ...
قالولها: مش هون، يا مرتا،
اكسري جرّة الطيبْ!
جبران،
يا غنيّة الطير الغريبْ
ما خلقت انتي، ما متت،
بس خطرت عا بال هالكون الرحيب
متل الشمس بتطلّ من "ضهر القضيب"
بتمرق تبوس الارز،
وبترجع تغيبْ!
***
ابعت لي خليل الكافر شويّه:
اهل المسابح زغرّو الله بصينيّه،
اهل المشالح كسّرو خيمة الحريّه
اهل المصالح قسّمو توب الالوهيّه
اهل القرايح دنسو العتبه السماويّه
اهل المسارح عهّرو طيبة الغنيّه
اهل المدايح زوّرو تذاكر الحنيّه..
واشرف منُنْ
اطهر منُنْ
احلى منُنْ
... مرتا البانيّه!
***
... و"اولادكم ليسوا لكم..."، شو باكْ؟
للعاصفه عم نفتح الشبّاك..
ما كنت انت لْ "كامله" امك؟
يمّا المدى ناداك
وهْشلت من اسمك ومن دمك،
وما أحلاكْ!
ولا تقول: الله فيك!
انتي في قلب الله
والحبّ ل تجلّى
مسافه بينكم خلّى
تا ترقص الريح بشجر عريان!

جبران...
بالآخر انا متلك بلا عنوان
خدني معك من اورفليس
وطمّني بلبنانْ!