فى حضور ولى النعم وممول الثورة القطرى خرج علينا رئيس الإخوان بأنياب ومخالب وأطاح بالجيش والدولة بجرة قلم وبعد ما قنديل طلب من الشعب إنه يلبس كوتونيل طلعت الأوامر لكل الشعب يلبس طرح وبكده إكتملت أركان إنهيار الدولة وتحويلها لدولة إخوانجية مليون المية جيش بقى لعبة فى أيد الإخوان شرطة حا تلم الدور وتلعب ع المضمون إعلام إخوانجى بسيطرة رؤساء التحرير الإخوانجية لضمان غسيل عقول الناس ومفيش مجال للمقاومة لقطار الإخوان الذى إنطلق ليدوس على الجميع.
طبعا مصير إللى حا يخرج فى مظاهرات المنصة فى 24 أغسطس حا يكون أسوء من يوم ماسبيرو والضرب حا يبقى فى المليان والروؤس حا تطير ومش حا تلاقى حد يسمى عليها وبكتيره حا يلموا الجثث ويرموها للكلاب لأن الإعلام حا يسميهم خونة وعملاء وحتى القبر حا يستخصروه فيه وكل واحد حا يرفع صوته حا ينضرب بالجزم تماما كما وعد الرئيس مرسى قبل الإنتخابات ( فاكرين لما قال حا ندوسهم بالأقدام) وأهو وعد ووفى واللى حا يقب براسه حا يقطعها له تماما لما الحجاج قال إنى أرى رؤوسا قد أينعت وقد حان وقت قطافه.
طبعا العيب على المجلس العسكرى إللى من الأول سلم دقنه للإخوان وكان فاكر حا يحفظ الجميل وكان يخرج من حفرة ويقع فى دحديرة لغاية ما إنهدت عليه الحفرة وبكتره لو خرجوا من الحفرة حا ينفضوا الغبار من عليهم ويلموا شنطهم ويسافروا على أبعد بلد هم وعوائلهم لأنهم تعلموا الحكمة من رأس الذئب الطائر القابع فى ليمان طرة.
اليوم حدث السقوط الأعظم لمصر وبعد ما كان لسه فيه ناس بتفلفص خلاص السر الإلهى طلع ومبقاش فيكى يا مصر حد يقدر يرفع راسه وكل الكلام الفارغ بإن مصر حا ترجع تقف على رجليها نوع من تعزية النفس عن المصيبة إللى عايشين فيها تمام كما يقول الدكتور لمريضه المصاب بالسرطان المنتشر فى كل حتة فى جسمه ومش فاضل غير إنه يكتب له شهادة الوفاة ويقعد يطمنه إن الأمل موجود ويمكن يطلع علاج يشفيه من السرطان الخبيث إللى تمكن منه.
معلش يا شعب مصر عيش يومك وإمشى فى ضل الإخوان 30 سنة جديدة وأعصروا ليمونه علشان تعدوا أيامكم وأشكروا ربنا على الكهربا إللى بتنقطع كام ساعة لغاية ما الإخوان يتعطفوا عليكم ويقطعوها خالص علشان تستريحوا من الدنيا وبلاويها لكن النقطة إلى لازم الرئيس يخرج ويعلنه للشعب هو الطرح إللى حا يلبسها للمصريين حا تكون قطن والا بوليستر علشان نحضر نفسنا من دلوقتى علشان مش عاوزين مشاكل خلينا نعيش أيامنا وخلاص وخلينا نقول لنفسنا يا فرحة ما تمت خدها الغراب وطار طرحة طرحة بس المهم الشعب يعيش.
0 comments:
إرسال تعليق