إلبسوا كوتونيل/ د. ماهر حبيب‏

بشرى عظيمة لشركة كوتونيل للملابس الداخلية فبعد إعلاناتها الهابطة التى تستعرض كافة أنواع البوكسرات وهو الإعلان المثير للقرف وقلة الذوق خرج علينا رئيس الوزرا يدعونا إلى لبس كوتونيل صيفا وشتاءا لتوفير الكهرباء وطبعا الموضوع ده تفرغت له وزارة البحث العلمى وخرجت لنا الوزارة الجديدة بالعلاقة الطردية بين إستخدام الملابس الملونة المستوردة وبين إرتفاع إستهلاك الكهربا وبين العلاقة العكسية بين إستخدام كوتونيل والإستهلاك الكهربى.

وعلى هامش البحث تم إكتشاف العلاقة بين أن تكون مواطن محترم وبين إستخدام الكوتونيل والمفاجأة الكبرى هى إكتشاف أن كل الفلول والبلطجية والحرامية فى مصر بتستخدم الملابس البوليستر والمستوردة من أفغانستان والصومال ولذلك فعلى كل مواطن صالح أن يثبت إستخدامه للكوتونيل وسوف يتم تقديم قانون بتخفيض الضرائب على لابسى كوتونيل المحترمين.

طبعا هناك سطحية فى معالجة المواضيع فلم يخرج لنا رئيس الوزرا ويقول لنا لماذا تنقطع الكهرباء الأن ومن سنتين كنا بنلبس البوليستر وما كانش فيه كوتونيل ولا نيله وبرضه الكهربا موجودة ولا تنقطع لدرجة أن المراكز الإقتصادية المصرية لم تكن تفكر فى المولدات الكهربائية لأن الكهربا عمرها ما إنقطعت فنجيب مولدات بالشيئ الفلانى ليه؟

فيه كمان مصيبة كبيرة زحلقها الرئيس وهو بيتكلم على أمل تكون مجرد إثبات موقف ومحدش ياخد باله منه دلوقتى لكن بعدين لما المصيبة تبقى ليل ونهار يقول لكم مش أنا قولت لكم السنة إللى فاتت إنقطاع الكهربا دلوقتى إختيارى بس بعدين حا يبقى إجبارى يعنى بصراجة شديدة جدا إن بكرة أسوء من النهاردة وإذا كنتوا زعلانين علشان الكهربا بتنقطع تلات أربع ساعات بكرة تترحموا على الأيام دى لما الكهربا تيجى يومين فى الإسبوع والباقى على ما تفرج بالظبط زى العراق قبل صدام وبعده.

طبعا الإخوان ووزارتهم كانوا بيتكلوا من وسع لما كانوا بره الحكم لكن إكتشفوا إن المشكلة فى الشعب ومش فى الحكام وعلشان كده حا يكون حل مشاكل مصر هو التخلص من كل المصريين والعمل على تطفيشهم فى أسرع وقت لغاية ما تصفصف على خمسة ستة مليون إخوانى على سلفى ودول خير مصر حا يفيض عليهم ويزيد أما باقى ال 75 مليون لو مشيوا بجد حا تنفرج على الوزارة أكثر من إنفراجة الملوخية على راس عبد السلام النابلسى.

يا شعب مصر خليك مؤدب وإلبسوا كوتونيل علشان توفروا الكهربا وإللى مش حا نلاقيه لابس الكوتنيل حا نعلقه فى شجرة أو على أقرب عامود كهربا قدام قصر العروبة أو على مدخل قناة الفراعين علشان تفكروا مليون مرة قبل ما تشتكوا من إنقطاع الكهربا الإختيارى إللى فى وجود قنديل حا يبقى إجبارى إلى ما شاء الله.