وعجبى/ د. ماهر حبيب‏

و عجبى

أسماء محفوظ تدعى للقتل عينى عينك والدنيا تنقلب والكفالة تندفع والبلاغ ينسحب قال أيه علشان هى من ثورجية ميدان التدمير وعجبى

عمرو أديب قبل نكسة يناير بيقول تولع الديموقراطية وبعد النكسة بيقول يلا نولع الحرب مع إسرائيل علشان نولع فى مصر كلها وعجبى

محمود سعد بيشتغل مذيع فى تليفزيون المصرى وكان بياخد 9 مليون جنية فى السنة ورئيس الجمهورية بيتحاكم على فيلا ب39 مليون جنية ومليون دولار فى البنك وعجبى

الإخوان من جماعة محظورة لجماعة محظوظة وعجبى

رئيس الوزرا فى مصر قبل النكسة ما بيحكمش وبعد النكسة برضه ما بيحكمش وعجبى

القطر قبل النكسة مبيوقفش لحد وبعد النكسة ما بيتحركش إلا لما الناس تمشى بعيد عن الشريط بالمحايلة وعجبى

الأقباط قبل النكسة كانوا بينضربوا أما بعد النكسة برضه بينضربوا وعجبى

لكن الأقباط كانوا بيضحكوا عليهم بالمجالس العرفية لكن بعد النكسة بيستعبطوهم بالمجالس العرفية وعجبى

الحرامى قبل النكسة كان بيقول للظابط معلش ياباشا وبعد النكسة الظابط بيقول للحرامى سامحنى يا باشا مكانش قصدى أضايق سعادتك إتفضل إسرق أنا مش هنا وعجبى

استاذ الجامعة قبل النكسة بيورث عياله وظيفته أما بعد النكسة فلسه بيورثها لعياله وعيال عياله وعجبى

المعابر قبل النكسة مقفولة لكن بعد النكسة بقت سداح مداح للإرهابيين وعجبى

فريق مصر فى الكورة قبل النكسة كان بطل أفريقيا 3 مرات ورا بعض وبعد النكسة بيخسر من طوب الأرض وعجبى

سينا قبل النكسة جنة على الأرض وكنز مليان دهب وألماظ وبعد النكسة جهنم الإرهابيين و صداع فى دماغ كل المصريين وعجبى

المصرى قبل النكسة بيشتغل شويه وما يعرفش حاجة إسمها مظاهرات وبعد النكسة يا مابيشتغلش يا إما مش لاقى شغل وبيتظاهر 24 ساعة علشان ما يشوفش وش المدام وعجبى

الست المصرية كانت بتضطر تغسل هدومها وتكوييها وهى رايحة الشغل والنهاردة بتشد العباية السودا وبتستحما من العيد للعيد بلاوجع دماغ وعجبى

الراجل المصرى كان بيحلق دقنه يوم بعد يوم والنهارده مابيحلقهاش وبيشترى حنة حمرا بدل من معجون الحلاقة وعجبى

الناس فى البورصة قبل النكسة يا تكسب يا تخسر لكن بعدها إنت خسران على طول وعجبى

قبل النكسة المستثمر بيتبص له بإحترام لأنه بيشغل ناس يفيد ويستفيد أما دلوقتى المستثمر لازم يكون يا مجنون يا خارج من السرايا الصفرا لأنه فى الأخر حا يشرف فى بورتو طرة وعجبى

زمان يقول لك يا بخت من كان النقيب خالو ودلوقتى بيقول لك لو كان ابوك لواء إتبرا منه ويا ريت تبلغ فيه علشان يروح السجن

الزمالك زمان ما كانش بيكسب الدورى وبعد النكسة برضه مش حا يكسب حاجة وعجبى

حالنا زمان كان مهبب و النهارده بعد النكسة الهباب زاد وكأنك يا ابوزيد ما غزيت وعجبى