الأطلال/ د. ماهر حبيب

شريط الأحداث إللى عمال يجرى قدام عينينا زى الأفلام الهندى وهو فى الحقيقة فيلم هوليودى من تأليف وإخرج الحاج أبو عمامة ومساعد المخرج ست البيت كلينتون وإنتاج قطرى والحقيقة الفيلم الهابط ده عمال يحقق أرباح خيالية للمنتج والمخرج والكومبارس والضحية هو المتفرج إللى هو إحنا لأنهم نصبوا علينا وقدموا لنا فيلم مضروب أصابنا بالتخلف العقلى والجمهور كسر السينما على إللى فيها من كتر خيبة أملهم فى الفيلم.

يبدأ الفيلم بحدوتة ما تستاهلش هى حدوتة أبو عزيزى إللى إنتحر بسبب ظروفه الخاصة ولأنه سيناريو متفق عليه بدأت المظاهرات ولأن بن على راجل ذكى فهم الملعوب بدرى بدرى وخلع وسقطت تونس فى يد الإخوان عن طريق صندوق الإنتخاب وبكرة وبعده حا نشوف تونس وهى لابسه الحجاب والجلابية الأفغانى والسياح لفينهم فى شوال وبيفتحوا الشوال جوه المية فى حمام السباحة والسايح بعد ما يخلص الحمام يلفوه فى الشوال وهو خارج علشان ما حدش يشوفه.

المشهد التانى فى الفيلم الهندى كان فى مصر وخربوا الدنيا فى ميدان التحرير ولأن الرئيس السابق مبارك كان فهمه بطيئ خلع نفسه بعد 18 يوم وبدل ما يروح يعيش فى حتة محترمة بعيد عن الهم ده تصور إنه حا يفضل محترم ولكن لأنها ثورة إستولى عليها الإخوان قرروا الإنتقام من حسنى مبارك وإتبهدل الراجل وإتحط فى القفص زى القرود فى جنينة الحيوانات ولأن السيناريو بتاع المخرج الأمريكانى والمنتج القطرى منصوص عليه يا الإخوان يا بلاش خربت الدنيا لما تنبه شباب الفيس بوك إنهم كانوا عبارة عن بغلة تركبها وتوصلك لأخر الشارع وخرجوا الشباب لأن كل واحد نزل الميدان سواء كان من عصابة أوباما أو من المنصوب عليهم أو جماعة أبريل ومايو ويونيو يؤمن بالمثل فيها لأخفيها فتخانق الجميع ويتم تمزيق مصر لكذا حتة ومش مهم مصر لكن المهم هو كعكة الحكم.

وفى وسط المشهد التانى كان هناك المشهد الليبى إللى فيه تم تدمير ليبيا لأنى لا أعتقد إن قوات الناتو إللى قعدت تضرب القذافى كانت بتحدف عليه بومبونى لكن الإخراج الأوربى للجزء ده جه بنظام التخيل ومهماش من المدرسة الأمريكانى إللى بتكسر الدنيا والكاميرات بتصور لكن المسيو ساركوزى يؤمن بأنه يستعين على قضاء حاجته بالكتمان فتم تدمير ليبيا سوكيتى ودبح القذافى ووضع السيخ المحمى فى مؤخرته وخروجه من فمه كأردئ أنواع أفلام الرعب وبرضه ليبيا وقعت فى أيد الإخوان الليبين علشان يكملوا الوحدة الإخوانية.

ثم جاء المسلسل السورى ورأينا الوزير القطرى ورئيس الجامعة العربية قاعد جنبه زى قلته ويتم إدارة الحوار السورى بنفس الطريقة التى تم بيها الحوار الليبى وسوف يتم الضغط حتى النهاية لكى تسقط سوريا فى يد الإخوان ويتم الإتحاد مع إخوان تركيا ثم إخوان حماسستان غزة مع وجود إخوان الأردن معاهم ثم يضع الجميع أيديهم فى يد إخوان مصر وإخوان ليبيا مع إخوان البشير وإخوان الغنوشى بتونس وها هم إخوان المغرب يكتسحون الإنتخابات فيتحول الشرق الأوسط إلى منطقة إخوان القاعدة والجهاد ويترك الحاج أبو عمامة المنطقة وقد تحولت لقطعة خراب ودمار وعلى الرئيس الأمريكى القادم مواجهة الخراب وكأن كل رئيس أمريكى بيتوحل فى حاجة ويسلم الرئيس إللى بعده خابور أشد من الخابور الأولانى فبعد ما واجهه بوش مأساة 11 سبتمبر خرب الدنيا بغزو العراق وسلم الخاذوق لأوباما إللى بدل ما يكحلها عماها وخلى الحكاية سورياستان +أردنستان + غزستان + مصرستان + سودانستان + ليبياستان + تونستان + مغربستان = مورستان ورجع المنطقة 14 قرنا من الزمان.

وللأسف الشديد لا يوجد الأن مخرج مبدع زى المخرج الراحل حسن الإمام إللى يخلينا نعيط طول الفيلم لكن فى الأخر فجأة يتجوز البطل والبطلة ونعيط من الفرح وإحنا بنتفرج ع الرقاصة فى الفرح ولكن لأن أوباما خلى الرقص حرام فقد تم الإكتفاء بالحزن والهم والعباسية وميدان التحرير وأقول للمخرج أبو عمامة روح منك لله خربت لنا بلادنا وتركتنا نبكى على الأطلال