إلحقوا مصر بتولع/ د. ماهر حبيب

الصورة المرفقة بالمقال أهم من المقال نفسه لأنه يعبر عن الواقع المرير الذى نعبش فيه من أن الشرطة التى تحمى الأمن صارت تنفخ فى الذبادى فشخص واحد بحمل حجرا يجرى أمامه أورطة شرطة وهى صورة حقيقية منشورة فى الأهرام ومش معمول لها فوتوشوب بتاع أسامة سرايا وصورة مبارك جارر وراه أوباما وأنا أعتقد إن الصورة دى حا تبقى رمز المرحلة السودا إللى جاية مفيش أمن لكن فيه بلطجة فيه رعب والناس الطيبة حا تروح فى الرجلين فيه إنهيار إقتصادى لكن عندنا برلمان الدقون والجلابيات وحايبقى المشى جنب الحيطة هو حكمة اليوم وكل يوم والمصرى حا يبقى خارج من بيته مفقود والراجع مولود.

إخوان طظ فى مصر مع السلفيين مع باقى أغبياء نكسة يناير إللى مش فاهمين حاجة وعاملين زى الهبلة إللى مسكوها طبلة طايحين فى ميدان التدمير وهات يا مظاهرات بس المصيبة إن الإخوان والسلفيين عارفين هما بيعملوا أيه وعايزين يلغوا الوثيقة الدستورية إللى بتنص على مدنية الدولة لكن الهم والباقى على باقى الأغبياء إللى عاوزين مظاهرة ويشبعوا فيها لطم يمكن يطلعوا فى التليفيزيون أو تيجى لهم طوبة تخليهم نجوم شباك وعاملين زى الأطرش فى الزفة ما هو مولد وصاحبه غايب.

خراب وحل بالبلد من أول دمياط إللى أهلها عاوزين يقفلوا مصنع بيوكل الناس عيش والموضوع مزقوق من حد ليه مصلحة فى خراب المصنع وإنشالله تجوع مصر قفلوا المينا وخسروا البلد ملايين ومحدش بيقول لهم عيب الصعيد مولع والناس بتخطف بعض وحرب العصابات شغاله بين القبائل ومحدش قادر يعمل حاجة وبسلامته ميدان التحرير موقف حال العاصمة و ناس كتيرة بيوتها إتقفلت ومحدش فارق معاه حاجة والبورصة المنكوبة كل يوم تخسر لها كام مليار وكأننا بنفرقع فشار أو بنقزقز لب والأحزاب الدينية عماله تخالف القانون ومحدش بيقول لها تلت التلاتة كام.

وسواء كانت الفوضى دى مقصودة أو عفوية فإحنا مضطرين نناشد الجيش يسك على موضوع الديموقراطية والضرب بيد من فولاذ على كل بلطجية الأحزاب وقفلوا على كل المواضيع لأن الدنيا لاهى ربيع ولا نيلة ده خراب مستعجل وإحنا عندنا كل واحد عنده حزب عامل نفسه نيرون واقف ماسك ربابة بلدى وبيغنى وروما أقصد مصر ماسكة فيها نار الدمار والفوضى فى كل مكان ولو فيه عدل كان كل بتوع السياسة الحاليين كانوا دخلوا ليمان طرة لأنهم مجرمين حقيقين فى حق مصر.

مصر بتولع يا مصريين ولو عاوزين تطفوها إلغوا الإنتخابات وإفرضوا الأحكام العرفية وإوقفوا البلطجة ولو بضرب النار وبلاش التحسيس على الثوار فملعون أبو الثورة إللى حا تضيع بلدنا وبنقول للمجلس العسكرى لو ما ورتش الناس السايبة دى العين الحمرا كلنا حا نغرق مع بعض فأرجوكم إنقذوا مصر وبعدين نبقى نتفاهم أرجوكم إلحقوا مصر بتولع